激嬲高层？吴业坤新剧被飞

　　激嬲高层？吴业坤新剧被飞！
　　吴业坤放完半年＂风流假＂后赶返港还工作债，首要任务是拍无綫剧，但有消息指其角色突然＂冇下文＂，加上近日孖丧挑机无綫的＂友台＂艺人193揽头揽颈，传因而得罪高层，最终冇份拍新剧，＂玩大咗＂的他急补镬听候发落！
　　吴业坤（坤坤）去年底连颁奖礼都缺席，单拖到日本Working Holiday玩够5个月，连同隔离期停工达半年时间，回港后即收拾心情复工，除赶录几首新歌，以平息唱片公司高层的＂怒火＂外，亦要投入与港姐陈晓华及陈敏之等合作的ICAC新剧。
　　被安排饰演廉署调查员的他，本月初开始已耐心等剧本以作准备，可是等了又等，却未收到进一步通知，直至近日再传出被＂弹钟＂消息，导火线之一是高调与经常寸爆无綫的ViuTV男团ERROR成员193（郭嘉骏）合作！虽然坤坤孖193合照时，已＂预警＂只是找一年前的＂合唱数＂，但网民仍议论纷纷，睇死他有＂被照肺＂的可能。
　　据知，等消息等到颈都长的坤坤，早前终盼到剧组与他联络，并为新剧开会，但当时他亦有所保留说：＂其实一直斟酌紧，因为除咗呢出剧，仲有其他工作排紧，叫做少少周旋紧，睇吓可唔可以两边（工作）都顺利做到啰！但你都知讲唔埋啦！＂不过，剧组后日举行的造型记者会，据知他并不在名单上，他昨日解释：＂套剧系寻日决定唔拍嘅，因为我会去做奥运嘅嘢，两个只能活一个，系拍唔到，唔系唔拍。＂又强调没得罪高层，否认遭＂雪藏＂，称身为艺人又刚回港重投岗位，当然希望接到不同工作。
　　另外，坤坤日前接受专访，谈及同期歌手胡鸿钧（Hubert）及许廷铿中，他是最先举行红馆个唱的歌手，但Hubert发展反超前，现已是无綫＂最受欢迎男歌星＂及剧集＂男一＂，问可感到在无綫机会少？坤坤表示不可强求，但仍感激娘家给予机会：＂我签咗其他唱片公司，只系‘嫁’咗出去啫！系未去到男主角地位，但都拍好重戏份嘅剧，亦唱过主题曲，好似拍咗成年《爱．回家》，做过‘男四、五’角色，令到唔同年龄层嘅观众认识我。＂
　　问可会羡慕极速上位的Hubert？他坦言有自知之明：＂我唔系典型嘅小生相、‘男一’嘅材料，所以宁愿挑战好玩嘅角色，留时间全力做歌手。＂他觉得每个人际遇不同，笑言也是监制眼中的＂受欢迎男歌星＂之一，曾被赞有Character（个性）：＂监制话喜欢用我，因为唔系演一个角色，而系将个角色变成我，好似唱人哋啲歌咁，我唔会学咗人哋，而系将人哋嘅歌变成自己嘅歌。＂
　　至于另一好友许廷铿离开华纳后现为自由身，问可会拉拢他加盟自己的唱片公司？坤坤断言拒绝：＂呢啲嘢唔好同我争，唔系惊咗佢，系唔需要啦！世界咁大，喺某个地方碰头咪算啰！＂他认为音乐没有高低之分，彼此风格亦不同，强调做不成同门非代表不友好：＂近几年大家各有各忙，系少咗联络，不过友情冇变。
　　转自看港剧