TVB剧集女歌手Rock妹上身与何雁诗同台飙歌

　　▲ （左起）李妍、谭嘉仪、王梓轩、何雁诗、龚柯允在《演斗听》骚音乐才华。
　　TVB节目《演斗听》在本周六（8月28日）将会播映第3集，今次4位嘉宾都是唱得之人，包括谭嘉仪跳出框框Rock妹上身，何雁诗忽然变了何jazz，新人李妍佛系唱歌，而马拉歌手龚柯允就大胆挑战Bollywood style。
　　谭嘉仪兴奋称：「我自己中学时都有夹band，但入咗行后好少唱啲rock嘅歌，今次係一个突破，可以喺《演斗听》试到我一直都好锺意嘅pop rock，我觉得成个节目好多嘢玩，将啲歌曲改编成唔同风格，又要我哋自己创作啦！」
　　她表示平时很少rap：「今次有机会rap几句，虽然好紧张，不过可以将我哋自己嘅歌改编成唔同style去唱，我觉得超正㗎！」
　　何雁诗唱Jazz
　　何雁诗则表示：「我唔係特别叻唱Jazz，只係锺意听，今次可以发挥吓！同平时嘅风格唔同，平时自己出歌会俾人produce晒，听过十万次先拎出嚟，今次係一个未出街前版本，好紧张！」
　　新人李妍称：「因为时间唔係太多，今次音乐嘅准备元素都多，都惊会记唔到歌词呀，个厂又冻，喉管又会收缩啦！好彩so far都ok！」
　　龚柯允亦谓：「其实jam音乐係一件开心事，一有音乐，个人会跟住节奏郁，今次仲要咁多唔同嘅风格，虽然係好大嘅挑战，不过都会尝试去玩，喺〈我点你作〉嗰part，我就好搞笑㗎。」
　　她续称；首歌充满马来西亚风情，有华人、马来人、印度人，好似咖哩嘅感觉好rich，同埋有印度唱腔，我自己都好锺意模仿唔同种族嘅唱歌声。」
　　王梓轩讚嘉宾出色
　　对于4位嘉宾嘅表现，王梓轩大讚：「其实我哋个骚本身都係想搵番嘉宾最强嘅嘢，可能係音乐、可能係幽默感、可能係性格、可能係表演风格。今次好开心无论平时写歌嘅朋友，或演绎上好高超嘅朋友，都可以玩得尽兴。」
　　他高兴表示：「我哋邀请新人，大家未必好认识佢嘅面孔，但佢嘅声音同创作都好好，李妍都好好。何雁诗、龚柯允同谭嘉仪大家已认识，3个性格好唔同，何雁诗有深造jazz，我师傅阿熹话龚柯允係天上嚟嘅声音，但係佢都可以好搞笑，斯文嘅谭嘉仪可以跳出框框，做到活力、反叛嘅表演。」
　　梓轩续指：「我哋希望每位歌手嚟到都有啲度身订造嘅嘢俾佢哋玩，当然我哋都有好多即兴嘅创作啦！」
　　他指大家在现场都绞尽脑汁：「每次嘅opening我哋都唔係就咁叫个名出嚟就登场，我哋想将佢哋嘅成名作改编，将几个歌手拉埋去一个曲目到，大家好似有个好澎湃嘅出场，今次准备咗3日，再加排练及拍摄用咗5日。」
　　但梓轩觉得一切都好值得：「见到好音乐，见到演斗band发挥得咁好，每一集都搵到新嘅方法去表现自己，我哋鼓手Joey，你唔好以为佢哑嘅，其实佢係rapper，一路係咁打(鼓)，佢一开口就点石成金，希望演斗band每个人都可以发亮。」